Նորաբաց կարի գործարան Ջավախքի Գանձա գյուղում
Հոկտեմբերի 20-ին Հայաստանի ամերիկյան համալսարանի (ՀԱՀ) Թրփանճեան գյուղական համայնքների զարգացման ծրագրի օժանդակությամբ Ջավախքի Գանձա գյուղում բացվեց Ցոնարա Թանգամյանի կարի գործարանը: Բիզնեսը 4 աշխատատեղ է ստեղծել համայնքում: Բացման արարողությանը ներկա էին Թրփանճեան ծրագրի ղեկավար դոկտոր Հարություն Արմենյանը, ծրագրի թիմը, ինչպես նաև համայնքի այլ բնակիչներ ու հյուրեր:
Տկն. Թանգամյանի բիզնեսի օժանդակությունը իր համայնքին զգալի է. գյուղում կարի արտադրանքով միայն ինքն է զբաղվում, իրերի բարձր պահանջարկ կար:
Նորաբաց կարի գործարանը աշխատում է ժամանակակից սարքավորումներով, ինչը թույլ կտա բարձրացել արտադրանքի որակը, ժամանակի ընթացքում դիվերսիֆիկացնել այն և ներկայացնել ավելի լայն շուկայում:
Տկն. Թանգամյանը շնորհակալություն է հայտնել Թրփանճեան ծրագրին, որի աջակցությամբ իրականություն է դարձել իր վաղեմի երազանքը. նա ձեռք է բերել ձեռնարկատիրական գիտելիքներ և հմտություններ, ստացել է բիզնես վարկ և հաջողությամբ հիմնել է իր բիզնեսը:
Թրփանճեան գյուղական համայնքների զարգացման ծրագիրը Ջավախքում գործում է 2010 թ.-ից և հնարավորություն է ընձեռնում գործարարներին ստանալ բիզնեսի կառավարման գիտելիքներ ու հմտություններ և ցածր տոկոսադրույքով վարկավորման հնարավորություն՝ սեփական ներդրումն ունենալով համայքների զարգացման գործում:
Ծրագրի և նորաբաց կարի գործարանի բացման արարողության մասին պատմող տեսանյութը՝ այստեղ https://www.youtube.com/watch?v=6FxFRQIdBvI: Տեսանյութի լեզուն հայերենն է: