ՀԱՀ ԹԳՀԶԾ-ն աջակցում է Վայոց Ձորում նոր բիզնեսի բացմանը
ԱՐԵՆԻ, Հայաստան: Հայաստանի ամերիկյան համալսարանը (ՀԱՀ) ուրախ է հայտարարել Վայոց Ձորի մարզում մեկնարկած նոր բիզնեսի մասին, որը բացվել է Թրփանճեան գյուղական համայնքների զարգացման ծրագրի (ԹԳՀԶԾ) կայուն աջակցությամբ:
Անցյալ շաբաթ տեղի ունեցավ ԹԳՀԶԾ–ի շահառու Հայկ Հարությունյանի բիզնեսի պաշտոնական բացումը Արենի համայնքում։ Ձեռնարկատերը «Շեն Արենի» ապրանքանիշով շինանյութի մանրածախ առևտրի խանութ է հիմնել՝ համայնքում ստեղծելով ևս մեկ աշխատատեղ։ Արենին վեց գյուղերից բաղկացած խոշորացված համայնք է, և այս նոր խանութը՝ հիմնված համայնքի կենտրոնում, հասանելի է բոլորին:
Շինանյութերի մանրածախ խանութ հիմնելու գաղափարով Հարությունյանը դիմել է ԹԳՀԶԾ–ին և ընդգրկվել ձեռներեցության ծրագրում, որտեղ ձեռք է բերել համապատասխան գիտելիքներ և հմտություններ մարքեթինգի, ֆինանսական կառավարման, գործառնական ռազմավարության ոլորտներում։ Դասընթացի ավարտիննրա բիզնես ծրագիրը և գաղափարը ստացել են վարկավորման և իրականացման հաստատում:
Այսօր նրա շինանյութի խանութն աշխատում է ամբողջ ուժով։ Վաճառքները հետևողականորեն աճում են, և Հարությունյանն աստիճանաբար ընդլայնում է շինանյութերի տեսականին՝ շինարարական ընկերությունների և մատակարարների հետ համապատասխան ցանցային կապի ընդլայնման միջոցով։
Հարությունյանը երախտապարտ է ԹԳՀԶԾ–ին և ակնկալում է շարունակական համագործակցություն՝ վստահ լինելով, որ ևս մեկ անգամ կդիմի ծրագրին իր նոր բիզնես գաղափարները իրականացնելու նպատակով։ Նրա մայրը՝ Աննա Ղազարյանը, նույնպես նախկինում եղել է ԹԳՀԶԾ–ի շահառու: Վերջինս Արենիում հիմնել է հյուրատուն և հետևողականորեն զարգացրել իր բիզնեսը:
Հարությունյանն ընդունում է այն անգնահատելի աջակցությունը, որ ստացել է ԹԳՀԶԾ –ից` նշելով. «Ես այնքան շնորհակալ եմ ԹԳՀԶԾ–ին: Առանց ծրագրի աջակցության ես չէի կարողանա իրականացնել իմ բիզնես գաղափարն իմ հայրենի գյուղում»:
ՀԱՀ–ի Թրփանճյան գյուղական համայնքների զարգացման ծրագիրը կրթություն, ֆինանսավորում և խորհրդատվություն է տրամադրում Շիրակի, Տավուշի, Վայոց ձորի, Գեղարքունիքի, Լոռու և Արարատի մարզերի գյուղական համայնքներում, ինչպես նաև Արցախում և Ջավախքում (Վրաստան) առկա և սկսնակ բիզնեսներին:
Համայնքների ցանկը և ընդունելության չափանիշները կարող եք գտնել այստեղ: Ծրագիրը շարունակում է ընդունել դասընթացի հաջորդ փուլի հայտեր։