ՀԱՀ ԹԳՀԶԾ-ն աջակցում է նոր բիզնեսների հիմնմանը
Հայաստանի Ամերիկյան Համալսարանը (ՀԱՀ) ուրախ է հայտարարել Շիրակի և Տավուշի մարզերում երկու նոր բիզնեսի հաջող մեկնարկի մասին՝ Թրփանճեան գյուղական համայնքների զարգացման ծրագրի (ԹԳՀԶԾ) մշտական աջակցությամբ:
Կարի արտադրամաս Հաղարծինում
ԹԳՀԶԾ Տավուշի թիմը՝ դոկտոր Հարություն Արմենյանի և Զորայր Կիրակոսյանի գլխավորությամբ, ներկա է գտնվել Տավուշի մարզի Հաղարծին գյուղում ԹԳՀԶԾ-ի շահառու Գայանե Թամամյանի կարի արհեստանոցի հանդիսավոր բացմանը։ Միջոցառմանը ներկա էին տեղի համայքների բազմաթիվ ներկայացուցիչներ: Ելույթ ունենալով հավաքված բազմության առջև՝ դոկտոր Արմենյանը ներկայացրեց ծրագրի նպատակները, նոր մարտահրավերներն ու ապագա ծրագրերը, գյուղական համայնքների զարգացման ու նոր աշխատատեղերի ստեղծման նշանակությունը։
Թամամյանը մասնագիտությամբ լրագրող է, աշխատում է Հայաստանի Հանրային հեռուստաընկերությունում՝ որպես թղթակից։ Նա նշեց, որ ԹԳՀԶԾ-ն իրեն հնարավորություն է տվել փորձել իր ուժերն այլ ոլորտում և հիմնել իր սեփական բիզնեսը հայրենի գյուղում: Թամամյանըշնորհակալություն հայտնեց ԹԳՀԶԾ-ին՝ դասընթացների, շարունակական աջակցության և համագործակցության հնարավորության համար:
Թամամյանի կարի արտադրամասը կոչվում է «Ռետրո արտել» ։ Այն ռետրո ոճի արտադրամաս է, որը արտադրելու է երկու տեսակի անկողնային սպիտակեղեն։ «Ռետրո արտելը» գտնվում է Թամամյանի տան առաջին հարկում։ Ներկայումս արտադրամասն ունի երկու աշխատակից, սակայն բիզնեսը աճի մեծ ներուժ ունի։
Գեղեցկության սրահ Ամասիայում
Հոկտեմբերի 10-ին տեղի ունեցավ ԹԳՀԶԾ-ի շահառու Արմենուհի Մկրտչյանի գեղեցկության սրահի բացումը, որը միակն է Շիրակի Ամասիա համայնքում։ Սրահը կահավորված է բոլոր անհրաժեշտ սարքավորումներով, մազերի, եղունգների և մաշկի խնամքի համար անհրաժեշտ գործիքներով: Նորաբաց «Ալկա» գեղեցկության սրահը նաև հագեցած է բոլոր սանիտարահիգիենիկ պայմաններով՝ բարձրակարգ ծառայություններ մատուցելու համար։
Մկրտչյանը մասնակցել է ԹԳՀԶԾ բիզնես դասընթացին, ձեռք բերել ձեռնարկատիրական գիտելիքներ և հմտություններ, որոնք նրան հնարավորություն են տվել մշակել իր բիզնես ծրագիրը և բիզնես վարկ ստանալ իր բիզնեսը հիմնելու համար՝ համայնքում երեք նոր աշխատատեղ ստեղծելով:
Բացման օրը Մկրտչյանն իր երախտագիտությունը հայտնեց ծրագրի անձնակազմին՝ ստացած գիտելիքների, ինչպես նաև դրական վերաբերմունքի և ուշադրության համար։ Նա հույս հայտնեց, որ իր համագործակցությունը ծրագրի հետ շարունակական կլինի։ Մկրտչյանը վստահ է, ԹԳՀԶԾ-ն ապագայում ևս կաջակցի իրեն՝ իրականացնելու իր նոր բիզնես գաղափարները։
ՀԱՀի Թրփանճյան գյուղական համայնքների զարգացման ծրագիրը կրթություն, ֆինանսավորում և խորհրդատվություն է տրամադրում Շիրակի, Տավուշի, Վայոց ձորի, Գեղարքունիքի, Լոռու և Արարատի մարզերի գյուղական համայնքներում, ինչպես նաև Արցախում և Ջավախքում (Վրաստան) առկա և սկսնակ բիզնեսներին:
Համայնքների ցանկը և ընդունելության չափանիշները կարող եք գտնել այստեղ: Ծրագիրը շարունակում է ընդունել դասընթացի հաջորդ փուլի հայտեր։