ԹԳՀԶԾ-ն աջակցում է երկու բիզնեսի ընդլայնմանը Տավուշի մարզում
ՏԱՎՈՒՇ, Հայաստան- Հայաստանի ամերիկյան համալսարանը (ՀԱՀ) ուրախ է հայտնել Տավուշի մարզի Սարիգյուղ համայնքում երկու նոր բիզնեսի ընդլայնման մասին։ Այս բիզնես նախաձեռնությունները կյանքի են կոչվել ՀԱՀ Թրփանճեան գյուղական համայնքների զարգացման ծրագրի (ԹԳՀԶԾ) կայուն աջակցության շնորհիվ։
Ձեռնարկությունների պաշտոնական բացմանը ներկա էր ԹԳՀԶԾ Տավուշի թիմը՝ Հարություն Արմենյանի և Զորայր Կիրակոսյանի գլխավորությամբ։
Լյովա Հարությունյանը ԹԳՀԶԾ-ից ստացած աջակցության շնորհիվ զգալիորեն ընդլայնել է իր պեմզաբլոկի արտադրությունը։ Նրա արտադրամասն այժմ հագեցած է բարձրորակ սարքավորումներով, որոնք թույլ են տալիս շուկայում ներկայանալ միջազգային չափորոշիչներին համապատասխանող շինանյութով: Բիզնեսի ընդլայնումը մեծացրել է գործարանի արտադրական հզորությունը՝ թույլ տալով բավարարել աճող պահանջարկը, ինչպես նաև ստեղծել երկու լրացուցիչ աշխատատեղ:
Բացման օրը Հարությունյանը շնորհակալություն հայտնեց ԹԳՀԶԾ-ին և ընդգծեց, որ իր բիզնեսի հիմնական շարժառիթը աշխատելն է՝ իմանալով, որ իր ստեղծած արտադրանքը ծառայելու է հայ ընտանիքներին, դառնա նրանց նոր կառուցվող տան կամ բիզնեսի հիմնաքարը։ Հարություն Արմենյանը ողջունեց նման մոտեցումը՝ ընդգծելով, որ ցանկացած բիզնես գաղափար պետք է խարսխված լինի բարձր բարոյական արժեքների վրա։
Հաջորդը Էդվարդ Եգանյանի՝ անասնակերի մշակման արտադրամասի բացումն էր՝ նույն համայնքում։ Եգանյանը և կինը՝ Մերի Անտոնյանը, իրենց նորարարական գաղափարն իրագործելու համար մասնակցել էին ԹԳՀԶԾ կազմակերպած դասընթացին, ինչպես նաև ստացել խորհրդատվություն, մասնագիտական և ֆինանսական աջակցություն։ Անասնակերի մշակման այս նոր սարքավորումը միակն է համայնքում, և թույլ կտա բարելավել անասնակերի չափաբաժինները և բաղադրությունը։
Բացման արարողության ժամանակ Եգանյանը իր երախտագիտությունը հայտնեց ԹԳՀԶԾ-ին՝ տեղի համայնքին անսասան աջակցության համար։ Նա նաև նշեց, որ իր ձեռնարկության շենքը կառուցվել է Լյովա Հարությունյանի կողմից արտադրված բլոկերով՝ ընդգծելով, որ ԹԳՀԶԾ-ն ոչ միայն աջակցում է անհատ ձեռներեցներին, այլ նաև ստեղծում է շահառուների կուռ համայնք։ Միջոցառմանը ելույթ ունեցան նաև ծրագրի մարզային գործունեությունը համակարգող տնօրեն Զորայր Կիրակոսյանը և ծրագրի ղեկավար Սոս Վարդումյանը, ովքեր վերահաստատեցին ձեռներեցներին շարունակական աջակցություն ցուցաբերելու իրենց հանձնառությունը։
ՀԱՀ Թրփանճեան գյուղական համայնքների զարգացման ծրագիրը տրամադրում է կրթություն, ֆինանսավորում և խորհրդատվություն Հայաստանի Շիրակի, Տավուշի, Վայոց Ձորի, Գեղարքունիքի, Լոռու և Արարատի մարզերի գյուղական համայնքներում և Ջավախքում (Վրաստան) գործող և սկսնակ բիզնեսներին: Համայնքների ցանկին և համապատասխանության չափանիշներին կարող եք ծանոթանալ այստեղ: Ծրագիրը շարունակում է ուսուցման հերթական փուլի հայտերի ընդունումը։